साधी, मनमोकळी माणसे

 मनमोकळ्या, साध्या स्वभावाच्या, अंतरात डावपेच नसलेल्या व्यक्तीला चार प्रकारची माणसे भेटतात.

१. या प्रकारच्या माणसांचा ही समोरची व्यक्ती इतकी साधी सरळ आहे यावर विश्वासच बसत नाही. त्यात त्या प्रकारच्या माणसांचा दोष नसतो. त्यांना आजवरच्या आयुष्यात वरवर साधेपणाचा आव आणून अंतिमतः गंडवणार्या व्यक्तीच भेटलेल्या असतात. त्यामुळे या प्रकारच्या व्यक्ती या साध्या सरळ व्यक्तीकडे थोड्या संशयाने आणि बर्याचशा अविश्वासानेच बघत असतात.

२. या दुस-या प्रकारच्या व्यक्तींना समोरची व्यक्ती साधी सरळ आहे याचा विश्वास पटलेला असतो. तिच्या साधेपणाचा त्या व्यक्तीला किती फायदा होतोय हे ही त्यांनी अनुभवलेले असते. क्वचित एकेकाळी या दुसर्या प्रकारच्या व्यक्तीही तशा साध्यासरळ असतात आणि कालांतराने त्यांना तसेच साधे सरळ, मनमोकळे जगणे जगरहाटीचा भाग म्हणून जगण्यासाठी मनाविरूध्द सोडून द्यावे लागलेले असते. अशा प्रकारच्या व्यक्ती त्या साध्या सरळ व्यक्तीविषयी थोडी असूयाच बाळगून असतात. काही व्यक्ती तर ती साधी व्यक्ती त्याचा साधेपणा टाकून जगरहाटीप्रमाणे आपल्या गटात कशी सामील होईल याचे चिंतन व कृती करायला सुरूवातही करतात.

३. या तिस-या  प्रकारच्या व्यक्तींनाही त्या साध्या सरळ व्यक्तीच्या तसे असण्याबाबत खात्री असते. याच्या स्वभावाचा फायदा घेऊन याला कसे गंडवता येईल ? या खटाटोपात या गटातील व्यक्ती असतात. तसे गंडवता आले तर "साधे सरळपणा असणे म्हणजे कसा मूर्खपणा आहे हे जगासमोर सिध्द करायला या तिसर्या गटातील व्यक्ती एकदम तयार असतात. आणि ती व्यक्ती यांच्या गंडवण्याला फसली नाही तर "अरे तो दिसतो तेवढा साधा वगैरे नाही बरं का. चांगला बनेल आहे." वगैरे लेबल्स लावायला हीच मंडळी हिरीरीने आघाडीवर असतात.

४. या गटातल्या माणसांनाही त्या व्यक्तीच्या साधे सरळ पणाबद्दल खात्री असते. क्वचित या गटातल्या मंडळींनीही तसे साधे सरळ वागण्याचा एकेकाळी प्रयत्न केलेला असतो. त्यात ते काही काळ यशस्वी / अयशस्वी झालेले असतात. पण ही समोरची व्यक्ती मात्र या त्याच्या साधेपणाचे आयुष्य जगण्यात यशस्वीच झाली पाहिजे असे त्यांना वाटत असते आणि त्यादृष्टीने ते त्या व्यक्तीला प्रत्यक्ष अप्रत्यक्ष मदतही करीत असतात.

कुठल्या प्रकारची व्यक्ती किती परसेंटेज ने जीवनात याव्यात हे मात्र त्या साध्या सरळ व्यक्तीचे नशीब आणि थोड्याफ़ार प्रमाणात कर्म ठरवते.

- As you write more and more personal, it becomes more and more universal या आंग्ल उक्तीवर विश्वास ठेवणारा, एक साधा सरळ, मनमोकळा जीव, वैभवीराम प्रकाश किन्हीकर. (चिंतन 27/05/’23)