मन हा मोगरा

 श्रीतुकोबांनी "मन हा मोगरा, अर्पूनी ईश्वरा" असे का म्हटले असेल याची प्रचिती आली.

बाजारात काल मोगरा छान आणि स्वस्त मिळाला म्हणून आणला आणि देवाला अर्पण केला. आज सकाळी देवघरात गेल्यानंतर बघितले की मोग-याची फ़ुले निर्माल्य झालेली आहेत, सुकून गेलेली आहेत पण त्यांचा सुवास कालइतकाच किंबहुना कालपेक्षाही जास्त दरवळतो आहे.

आपले मन इतके छान असावे की ते शिळे झाले, कुणी त्याला चुरगाळले, त्याचे निर्माल्य झाले तरी त्यातून अधिकाधिक सुगंधच बाहेर पडावा. जगाला त्याने आनंदच द्यावा. जग आपल्याशी कसे वागतेय याचा परिणाम आपला जगाशी वागण्यावर न व्हावा ही श्रीतुकोबांची इच्छा आहे.

- प्रा. वैभवीराम किन्हीकर, प्रभातचिंतन २७ मे २०२४.