ऐन हेमंतात भर दुपारी.

 अभियांत्रिकी महाविद्यालयात शिक्षक म्हणून काम करायला लागून मला यावर्षी २६ वर्षे झालीत.

दत्ता मेघे अभियांत्रिकी महाविद्यालय, नवी मुंबई, रामदेवबाबा अभियांत्रिकी महाविद्यालय, नागपूर, NMIMS चे मुकेश पटेल अभियांत्रिकी महाविद्यालय, शिरपूर तर आत्ताच्या संत विन्सेंट पलोटी अभियांत्रिकी महाविद्यालय, नागपूर यांसारख्या अत्यंत सुस्थापित महाविद्यालयांतून विद्यादान केले;

तर मधल्या काळात ज्या महाविद्यालयांना / विद्यापीठांना विद्यार्थी गोळा करण्यासाठी गावोगावी हिंडावे लागते अशाही महाविद्यालयात त्याच आनंदाने विद्यादान केले.

काही काही महाविद्यालयांत विद्यार्थ्यांना भेटण्यासाठी थेट त्यांच्या शाळेत भेटी द्यावा लागत, स्वतःच्या महाविद्यालयाचे थेट मार्केटिंग करावे लागे,

तर काही काही महाविद्यालयांतून थेट विद्यार्थ्यांमध्ये प्रचाराऐवजी शाळेतील व कनिष्ठ महाविद्यालयांतील शिक्षकांसाठी शिक्षणविषयक कार्यशाळा घेऊन आपल्या महाविद्यालयाचा छुपा प्रचार करावा लागे.

शेक्सपियरने Midsumner Nights' Dream लिहीले. तात्यासाहेब शिरवाडकरांनी त्याचे "ऐन वसंतात अर्ध्या रात्री" असे भाषांतरित नाटकही लिहीले. शेक्सपियरला वसंतातल्या मध्यरात्रींची एकूणच भुरळ पडल्याचे दिसले.

तशीच भुरळ मला सातपुड्यातल्या कुशीतली ही गावे घालतात.

भर पौष महिना, दुपारीसुध्दा बोचणारे थंड वारे, एकूणच सर्द वातावरण आणि अशा दुपारी कलत्या उन्हाचा उबदार आधार. वाहवा !

उपरोल्लेखित कार्यक्रमासाठी एका शनिवारी दुपारी, मध्य प्रदेशातल्या छिंदवाडा जिल्ह्यातल्या सातपुड्याच्या कुशीतल्या एका निवांत, सुशेगाद गावातल्या शाळेत घेतलेल्या यशस्वी कार्यक्रमानंतर तिथल्या आळसावलेल्या उन्हाला कॅमेर्‍यात पकडण्याचा हा प्रयत्न.

शनिवारी सरत्या दुपारसारखा निवांतपणा,

हेमंतातल्या दुपारचे सुखकारक उन्ह

आणि

सातपुड्याच्या पायथ्याशी असलेल्या गावात असलेला हवाहवासा सुशेगादपणा.

अशा ठिकाणी "पुन्हा या"असे निमंत्रण असायलाच पाहिजे असे नाही. आपले मनच त्या निवांतपणाला लोभवून तिथे वारंवार जायला चटावते. मग ४ वर्षांपूर्वी काढलेल्या या फोटोतून का होईना, आपण मनानेच तिथे जातो आणि तिथली शांतता तनमनात भरून घेतो, ती शांतता पुन्हा जगतो.

- निवांत, सुशेगाद, अमनपसंद, रामभाऊ शांतिवाले