वाहनविचार

शहरातून रस्त्याने जाताना कुठल्या कार ने किती वेगात जाव ? याचे आपल्या मनात काही आडाखे असतात.

मर्सिडीज, बीएमडब्ल्यू, जग्वार, या गाड्यांनी हत्तीच्या ऐटीत, डौलदार चालीने चालावे. एंजिनाची ताकद कितीही असली तरी शहरातून चालताना आसपासच्या गाड्यांना, पादचार्‍यांना मान वेळावून पहाण्याइतपत आणि हेवा करण्याइतपत वेळ मिळावा इतक्या आणि इतक्याच वेगाने जावे.

आज एक मर्सिडीजवाला उगाचच "आगभुकाई" करत प्रतापनगर चौकातून पसार झाला. हत्ती पळताना किती कुरूप दिसेल तशी ती कार दिसत होती.

वाटून गेल की अरे हा प्रांत तर इआन आणि नॅनो चा. आमच लहानस एंजिन तुम्हाला वाटत त्यापेक्षा जास्त पाॅवरफुल आहे हे जगासमोर त्यांना सिध्द करायचच असत. कायम वेगात पळवतात.

तमाम वाॅक्सवॅगन (का फाॅक्सवॅगन) वाले "खरतर जर्मन टेक्नाॅलाॅजीची मर्सिडीजच घेणार होतो. पण नाईलाजाने (मर्कच वेटिंग फार होत हो. शिवाय आमच्या हिला हवा तो रंगही मिळेना. वगैरे वगैरे कारणे सांगत) वाॅक्सवॅगन घ्यावी लागली" या आविर्भावात जरा जोशातच हाणत असतात. प्रत्येक १०० मीटरमागे आपला एवंगुणविशिष्ट हाॅर्न वाजवलाच पाहिजे असा नियम असल्यागत हाॅर्न वाजवत असतात.

बाकी आपले टाटा, मारूती, ह्युंदै वाले मध्यमवर्ग. भीडस्त आणि सामान्य. सगळ्याच बाबतीत Normal Distribution Curve च्या 1 sigma मध्ये येणारे.

—आपला वाहनविचारज्ञ (कशी वाटतेय माझी मलाच नवीन पदवी ?) रामभाऊ.