देवाचिये द्वारी - ६०

 

देवासी परम सख्य करावे I प्रेम प्रीतीने बांधावे I

आठवे भक्तीचे जाणावे I लक्षण ऐसे  II

 

देवाच्या सख्यत्वासाठी I पडावी जिवलगांसी तुटी I

सर्व अर्पावे सेवटी I प्राण तोहि वेचावा II

 

मेघ चातकावरी वोळेना I तरी चातक पालटेना I

चंद्र वेळेसि उगवेना I त-ही चकोर अनन्य II

 

ऐसे असावे सख्यत्व I विवेके धरावे सत्व I 

भगवंतावरील ममत्व I सांडूचि नये II

 

सखा मानावा भगवंत I माता पिता गण गोत I 

विद्या लक्ष्मी धन वित्त I सकळ परमात्मा II

 

पाहता देवाचे कृपेसी I मातेची कृपा कायसी I 

माता वधी बाळकासी I विपत्ती काळी II

 

देवे भक्त कोण वधिला I कधी देखिला न ऐकिला I 

शरणागतासि देव झाला I वज्रपंजरू II

 

देव प्रीती राखो जाणे I देवासी करावे साजणे I 

जिवलगे आवघी पिसुणे I कामा न येती II

 

म्हणोनि सख्य देवासी करावे I हितगुज तयासी सांगावे I 

आठवे भक्तीचे जाणावे I लक्षण ऐसे II

 

 

या सख्यभक्ती नावाच्या समासात श्रीसमर्थ आपण सर्व साधकांना भगवंताशी सख्य कसे असावे याबद्दल सांगताहेत. चातक पक्षी पाऊस पडो न पडो मेघांवर जसा रागावत नाही, चांदणे उगवो न उगवो चकोर पक्षी जसा  चंद्रावर न रागावता त्याच्याशी कायम सख्यत्व साधत असतो तसे सख्यत्व आपले आणि परमेश्वराचे असावे अशी श्रीसमर्थांची मनोमन इच्छा आहे.

 

II निवृत्ती ज्ञानदेव सोपान मुक्ताबाई एकनाथ नामदेव तुकाराम II

 II जयजय रघुवीर समर्थ II

 

- प्रा. राम प्रकाश किन्हीकर

(भाद्रपद शुद्ध द्वादशी, शके १९४४ , दिनांक ०७/०९/२०२२)